सोमबार, साउन १८, २०७८

कर्णालीमा भेन्टिलेटर र आइसियू,गण्डकीलाई नमस्कार

ज्योतिन्यूज २०७७ भदौ १५ गते १८:२५

कर्णाली, १५ भदौ ।
कोभिड –१९ का सङ्क्रमित बढ्दै गएपछि प्रदेश सरकारले १० वटै जिल्लामा सघन उपचार कक्षका साथै भेन्टिलेटर थप गरेको छ । यसअघि प्रदेशका जुम्ला, सुर्खेत र दैलेखमा मात्रै रहेका सघन उपचार कक्ष र भेन्टिलेटर बाँकी जिल्लामा पनि विस्तार गरिएको हो ।
सामाजिक विकास मन्त्रालयको स्वास्थ्य सेवा महाशाखाका अनुसार प्रदेश अस्पतालमा २५, कर्णाली स्वास्थ्य विज्ञान प्रतिष्ठान जुम्लामा १०, दैलेख, हुम्ला र कालीकोटमा पाँचपाँच, रुकुम(पश्चिम)को चौरजहारीमा चार तथा मुगु, हुम्ला, सल्यान र रुकुम(पश्चिम) जिल्ला अस्पतालमा दुईदुई सघन उपचार कक्ष विस्तार गरिएको छ । यसअघि प्रदेशभर ४० आइसिय थिए ।
त्यस्तै प्रदेश अस्पतालमा १०, कर्णाली विज्ञान स्वास्थ्य प्रतिष्ठानमा ६, दैलेख, कालीकोट र हुम्लामा दुईदुई तथा मुगु, रुकुम(पश्चिम), सल्यान र जाजरकोट अस्पतालमा एकएक भेन्टिलेटर जडान गरिएको छ ।
महाशाखाका प्रमुख वृषबहादुर शाहीले प्रदेशमा कोभिड–१९ का सङ्क्रमित बढ्दै जान थालेपछि मन्त्रालयले अस्पतालमा भेन्टिलेटर र आइसियु स्थापना गरेको बताउनुभयो । “सङ्क्रमितमध्ये कसैलाई तत्काल भेन्टिलेटर वा आइसियुमा राखेर उपचार गर्नुपर्ने अवस्था आएमा सहज हुनेछ”, उहाँले भन्नुभयो, “कतिपय अस्पतालमा मेसिन जडान भए पनि जनशक्तिको व्यवस्थापन गर्न बाँकी नै छ ।” महाशाखा प्रमुख शाहीले यही महिनाभित्र भेन्टिलेटर सञ्चालन गर्न सक्ने जनशक्तिलाई तालीम दिएर जिल्लामा खटाइने बताउनुभयो ।

गण्डकीमा ट्राफिक प्रहरीको नमस्कार अभियान

गण्डकी प्रदेश ट्राफिक प्रहरी कार्यालयले ट्राफिक प्रहरी र सवारी चालक तथा आम नागरिकसँगको सौहाद्र्रतालाई अभिवृद्धि गर्ने लक्ष्यका साथ प्रदेशभित्र नमस्कार अभियान शुरु गरेको छ ।
ट्राफिक प्रहरीको आम नागरिकसँगको सम्बन्धलाई प्रगाढ बनाउने तथा शिष्टता, सभ्यता र हार्दिकतालाई अनुशरण गर्दै ट्राफिक सेवा प्रवाहलाई सभ्य र सुसंस्कृत बनाउने लक्ष्यसाथ अभियान शुरु गरिएको गण्डकी प्रदेश ट्राफिक प्रहरी कार्यालयका प्रवक्ता प्रहरी नायब उपरीक्षक टेकबहादुर कार्कीले जानकारी दिनुभयो ।
अभियानअन्तर्गत चेक पोष्ट, सीमा नाका, कार्यालयमा बसेर सेवा प्रदान गर्ने ट्राफिक प्रहरी कर्मचारीले सेवाग्राहीलाई आदरयुक्त सम्बोधनसहित नमस्कार गर्ने, तोकिएको कानून बमोजिमको काम सम्पादन गर्ने र अन्त्यमा धन्यवादसहित पुनः नमस्कार गर्ने उहाँले जानकारी दिनुभयो ।–––

प्रतिक्रिया