शुक्रबार, असार ४, २०७८

राष्ट्रपतिलाई महाअभियोग, प्रधानमन्त्रीलाई अविश्वास प्रस्तावबाट हटाउन तरुण दलको माग

ज्योतिन्यूज २०७७ पुष १ गते ११:५८

काठमाडौँ । नेपाली काँग्रेसको भातृ संगठन नेपाल तरूण दलले राष्ट्रपति विद्यादेवी भण्डारी र प्रधानमन्त्री केपी शर्मा ओलीलाई हटाउन माग गरेको छ ।

राष्ट्रपतिलाई महाअभियोग लगाउने र प्रधानमन्त्रीलाई अविश्वास प्रस्ताव लगाएर हटाउन तरुणदलले माग गरेको हो ।

बुधबार एक विज्ञप्ति जारी गर्दै तरूण दलका अध्यक्ष जितजंग बस्नेतले सरकारको सिफारिसमा राष्ट्रपतिले संवैधानिक परिषद सम्बन्धी अध्यादेश जारी गरेकोमा विरोध गर्नुभएको छ ।

‘राष्ट्रपतिले देशको अभिभावक हुनुपर्नेमा प्रधानमन्त्रीको कारिन्दा र संविधानको भक्षक जस्तो देखिन आएको हुँदा राष्ट्रपतिलाई महाअभियोग र प्रधानमन्त्रीलाई अविश्वासको प्रस्तावबाट पदबाट हटाइ मुलुकलाई संकटबाट मुक्त गर्नका लागि नेपाल तरुण दल केन्द्रीय समिति जोडदार माग गर्दछ,’ अध्यक्ष बस्नेतले निकालेको विज्ञप्तिमा भनिएको छ, ‘स्वेच्छाचारी तरिकाले ल्याएको संवैधानिक परिषद सम्बन्धी अध्यादेश अत्यन्तै अलोकतान्त्रिक, संविधानको मर्म र भावनाविपरीत छ। त्यसैले उक्त अध्यादेश तुरुन्त फिर्ताका लिन र जारी अध्यादेशलाई टेकेर तत्काल कुनै पनि निर्णय नगर्न तरुण दल केन्द्रीय समिति अनुरोध गर्दछ’।

सरकारले महिनौंदेखि संसदलाई बन्धक बनाएको आरोप लगाउादै तरुण दलले उपसभामुख पद खाली राखेर प्रधानमन्त्रीले स्वेच्छाचारी तरिकाले अध्यादेश ल्याएको बताएको छ ।

प्रतिक्रिया