सोमबार, असोज ४, २०७८

छोरीको नाममा शेयर किनेका धितोपत्र बोर्डका अध्यक्षमाथि अख्तियारले थाल्यो अनुसन्धान

ज्योतिन्यूज २०७८ साउन १७ गते १७:५१

काठमाडौं । छोरीको नामबाट शेयर खरिद गरेको आरोप लागेका धितोपत्र बोर्डका अध्यक्ष भीष्मराज ढुंगानामाथि अख्तियार दुरुपयोग अनुसन्धान आयोगले छानविन शुरू गरेको छ ।

सर्वोत्तम सिमेन्टको शेयर खरिद गर्दा उनले छोरीको नामबाट गरेको भन्दै अर्थ मन्त्रालयले तीन दिने स्पष्टिकरण माग गरेको थियो ।

सोही क्रममा अख्तियारले पनि छानविन शुरू गरेको हो ।

बुक बिल्डिङबाट निष्कासन हुन लागेको सेयर छोरीका नाममा खरिद गरेकोप्रति अनुसन्धान गरी कारवाही गर्न माग गर्दै ढुंगानाविरुद्ध उजुरी परेपछि अख्तियारले सो सम्बन्धी कागजात झिकाएको छ ।

अध्यक्ष भीष्मराज ढुंगनाले बुक बिल्डिङको अनुमति दिएसँगै पाएको ‘गोल्डेन सेयर’ छोरीको नाममा लिएको केही दिनअघि खुलेको थियो । अध्यक्षकी छोरी रेविका ढुंगानाको नाममा १२ हजार कित्ता सेयर किनेको सार्वजनिक भएको थियो ।

अख्तियारले बोर्डका अध्यक्ष ढुंगानासँग बुक बिल्डिङमार्फत सर्वसाधारणका लागि सेयर जारी गर्न दिएको स्वीकृति सम्बन्धी सबै कागजात मागेको छ । धितोपत्र बार्डले छोरीका नाममा र नेप्सेका सीईओ चन्द्रसिंह साउदले पत्नीका नाममा २५० रुपैयाँका दरले सेयर किनेपछि अहिले यो विषय विवादित बनेको छ । सर्वोत्तमले बुक बिल्डिङङमार्फत आईपीओ जारी गर्दा यसको प्रतिकित्ता मूल्य ७५० रुपैयाँ हाराहारीमा आउने बताइएको छ ।

धितोपत्र बोर्डका अध्यक्ष ढुंगाना र नेप्से सीईओ साउदले आचारसंहिता बाहिर गएर सेयर खरिद गरेको भनेर लगानीकर्ताले उजुरी आएको अख्तियार स्रोतले जनाएको छ ।

प्रतिक्रिया