शुक्रबार, कार्तिक ५, २०७८

तीन प्रतिवेदन पारित गर्दै सकियो एमाले केन्द्रिय कमिटी बैठक

ज्योतिन्यूज २०७८ असोज १० गते १८:५९

काठामडौँ– नेकपा एमाले केन्द्रीय कमिटीको बैठक सकिएको छ । शुक्रबार सुरु भएको बैठक आइतबार तीनवटा प्रतिवेदन पारित गर्दै सकिएको हो ।

अध्यक्ष केपी शर्मा ओलीले प्रस्तुत गरेको राजनीतिक प्रतिवेदन, महासचिब ईश्वर पोखरेलले प्रस्तुत गरेको सांगठनिक प्रतिवेदन र उपमहासचिब विष्णु पौडेलले प्रस्तुत गरेको विधान संशोधन मस्यौदा बैठकले सुझाबसहित पारित गरेको प्रचार विभाग प्रमुख योगश भट्टराईले जानकारी दिए ।

तीनवटै प्रतिवेदनमाथि १० वटा समूह बनाएर शनिबार छलफल भएको थियो । सो छलफलमा आएका सुझाब तथा प्रश्नबारे अध्यक्ष ओलीलगायत प्रतिवेदन प्रस्तुतकर्ता नेताले जवाफ दिएका थिए । जवाफ दिनेक्रममा अध्यक्ष ओलीले संसद विघटन ठिक रहेको भन्दै बचाउ गरेका थिए ।

उता ७० वर्षे उमेर हद कायम राखिने जवाफ उपमहासचिब पौडेलले दिएका थिए । उनले विधान महाधिवेशनले निर्णय गरेमात्र सो व्यवस्था परिवर्तन हुने अन्यथा ७० वर्ष उमेर पुगेकाले कार्यकारी पद लिन नपाइने व्यवस्था कायम रहने जानकारी दिएका थिए ।

प्रचार विभाग प्रमुख भट्टराईका अनुसार विधान महाधिवेशनमा भाग लिने प्रतिनिधिहरुबारे यसअघिको निर्णयमा केही सुधार गरिएको जानकारी दिए । यसअघि विभागबाट १५ जना प्रतिनिधिले भाग लिने भनिएकोमा अब ५ जनालेमात्र भाग लिन पाउने भएका छन् । करिब ५ हजार प्रतिनिधिले महाधिवेशनमा भाग लिने उनले बताए ।

बैठकमा अर्का महासचिब घनश्याम भुसालले भने फरकमत राखेका छन् । बैठकपछि सञ्चारकर्मीहरुसँग कुरा गर्दै भुसालले आफूले केही फरकमत राखेको बताए । उनले राजनीतिक प्रतिवेदनमा फरकमत राखेका हुन् । उनले अहिले समाजमा परिवर्तन भइसकेको भन्दै त्यसलाई समाजवादसम्म लैजाने कार्यक्रमबारे यसअघिकै अडान राखेको बताए ।

केन्द्रीय कमिटीले पारित गरेका ३ वटै प्रतिवेदनलाई यही असोज १५ देखि १७ गतेसम्म काठमाडौँमा हुने विधान महाधिवेशनमा पेश गरिने छ।

प्रतिक्रिया